wanhoisecret
patreon
「打着紅旗」002
🕑 Added 2018-10-12 14:06:37 +0000 UTC 「開放改革40年真相」今年係中華人民共和國六十九週年紀念， 極之多愛國組織亦同一時間慶祝今年開放改革40週年！我每次見到都笑到收唔到聲，當年以鄧小平為首嘅所謂經濟改革方案，自己推翻社會主義制度之下嘅規劃經濟，全方位投向資本主義社會下嘅市場經濟，仲成功添！咁即係資本主義打贏社會主義啦！「成功實踐係唯一體驗真理的道路」 中共自己講㗎！
早幾日我參與左派活動慶祝十一國慶晚宴， 坐喺我隔離嘅係一個香港其中一間最大愛國南貨店嘅D老闆，佢同我好好傾，佢就講咗好多故事畀我聽！ 我就問佢( 少少特登喇):「開放改革40週年喎！你哋開唔開心呀！」D:「當然係唔開心啦!」 我心裏面就邪少咗一下， 豎起隻耳聽佢講故仔啦！
佢話開放改革之前佢喺大陸，被視為「愛國商人」，佢專做土產生意，所有去到邊個省份攞貨都係獨家，因為規劃經濟唔需要競爭對手，經大陸出入口公司直接運去香港，可以話係必賺生意，而且係發達生意……好多人都好眼紅佢呢啲「愛國人士」， 1978年鄧小平突然間經濟改革，一間又一間出入口公司倒閉或者變成私有化公司，容許其他商業機構返大陸做生意，再冇獨家市場喇， 國家利用完你賺外匯拜拜你條尾啦！自己公司咪要同全球公司一齊去爭生意囉之後！你都唔夠膽同國家嘈㗎！愛國就係咁㗎啦！
而D老闆講咗開放改革之前嘅小故事畀我聽，由於50年代韓戰之後，美國對中國貨品進行禁運，港英政府都嚴守禁運規例， 中國土產都唔可以經香港運去美國！於是乎D老闆間大公司，為咗瞞騙香港工務局去查貨，大批數以噸計荔枝運到嚟香港之後，佢就連同夥記走去流浮山一棵荔枝樹拍照影相話畀工務局聽呢位置， 啲荔枝嚟自流浮山樹林，之後又運呢一大批蓮藕片， 佢哋公司又去到元朗濕地搵一塊蓮藕池， 攞舊蓮藕切片影相話畀工務局聽啲蓮藕係來自新界！甚至大陸運來之罐頭將包裝紙全部拆毀，運到美國再重新包裝包裝紙，當真係香港製造既罐頭！D老闆話當時所有呢啲獨家銷售嘅愛國商人產品全部都係做假文件及講大話先至發達㗎！
若果佢哋肯對住鏡頭講嘅話幾好呢！笑死我！
Comments
從不收手！
我做緊嗰間物流公司有個大陸客，上年將同一批貨，不停咁重覆運蒞香港再隔幾日兜亂佢運返大陸。原來係因為大陸有出口補貼，佢將同一批野出口再入返，做足一年，呃足一年。其實大陸人做假真係咁多年都冇變過🤦🏻♂️
呢個年代已經唔可以講真話既年代!!
