wanhoisecret
patreon
元朗恐襲
🕑 Added 2019-07-22 16:21:54 +0000 UTC我終於有啲時間同有啲精神去寫呢篇野！元朗恐襲，相信令到大家簡直係覺得香港社會去咗一個無政府狀態！咁我就分享一下星期日晚前因後果啲事件。話說早係星期六，朝頭早我已經有不同嘅途徑收到有關星期日夜晚元朗將會有黑社會斬市民嘅消息，而我好多傳媒朋友都已經一早收到呢個消息，所以首先我想講經濟日報副社長石鏡泉星期六下晝參加撐警集會嘅時候，我深信佢亦都收到呢個消息，佢唔單止冇去表達關注仲要支持一班黑社會攞武器打人，呢啲就係我哋而家香港傳媒嘅高層！當然我亦都曾經考慮過好唔好將呢個傳聞消息放喺Facebook？但難處就出嚟啦！首先我哋每一日都收到好大量嘅傳聞，真係唔可以每一日都擺上Facebook叫人小心，第二呢樣野好多市民都唔明，因為任何牽涉到黑社會嘅消息，無論你係咩位置嘅人只要公開講述，香港政府就可以引用「公安條例」嚟到邀請發放消息嘅人協助調查，若果你唔配合亦都可以引用公安條例去將你拘捕！所以90年代當時嘅泛民主派竟然可以支持通過呢條條例我當時都好震驚！冇計啦！時代不能逆轉！咁我就靜觀其變同埋背後要安排好多嘢啦！由於7月21號會有大型遊行，我當日就已經攰到行唔到，但手頭上我睇住個班嘅救護後生，都要早啲準備，所以早在星期六晚我完成講座之後，就要去隊救護細路都探一探班，給予所需支援。亦都確定佢哋有安全屋係中上環運作正常！咁星期日我只能觀察情況，直到星期日夜晚元朗真係發生黐孖筋恐襲，我第一時間當然要聯絡我班救護細路，佢哋有冇去到呢？好坦白講，我相對比較自私，我係唔想佢哋去到現場，但係我聯絡嘅時候，其中四個救援後生已經去咗元朗，其中一個後來我先知好彩佢有軍用頭盔，因為一去到元朗就已經比白衫黑社會用鐵通打咗四次頭，頭盔後來重飛甩咗！唔見左啦！嗰班痴線嘅黑社會就算見到救援隊都打！咁我知道後冇辦法，其實阻止唔到班救援後生仔嘅熱誠，佢哋點都要去救人！咁我背後就聯絡我元朗嘅朋友，安排左一間安全屋，通知佢有咩事就搵我攞地址上安全屋！後來當然佢哋冇用到因為佢哋跟咗傳媒大隊行相對比較安全！另一邊廂，我就開始聯絡各路人馬，探聽究竟元朗發生乜事，首先一個上咗岸嘅老叔父同我講，當中打人嘅黑社會包括左上水走水貨黨，因為認為上星期班示威者影響咗佢哋嘅利益關係！已後來我聯絡左個香港政府裏面我信得過嘅線人，佢都係內部探聽，聽到返嚟嘅消息係，警察收到指令唔做嘢就係真嘅！而呢次元朗恐襲，依照佢嘅消息來源，就係話成個策劃來自中聯辦，中聯辦直接搵當地黑社會溝通俾錢進行呢次行動，完全繞過新界鄉紳及鄉議局，但白衫黨裏面亦都有鄉紳嘅人，亦都可以話係鄉紳之間有內鬥，當然黑社會之間都有內鬥啦！情況就一發不可收拾！咁我做嘅嘢都有限，只能睇住電視直播所有人士散曬，等埋廢柴指揮官記者招待會完結，我逐個逐個救援仔仔點返晒數齊齊整整我先再諗瞓覺！人生我去到呢個年紀，走上前線我就唔得㗎啦！大家各自爬山啦！
Comments
契機係2029年。丁權要滿18歲或以上，要2047年6月30日前滿18歲，2029年6月30日前出生嘅將會係最後一批擁有丁權嘅原居民
聽到個講法，就係警察故意唔做野(一段時間)，黑社會就係呢段時間嚇市民，警察再出番黎，等D人覺得無左警察唔得，想得番人心，但好明顯呢段戲一D都唔成功，只令到市民對警察更不滿。
大家努力
警察收到order唔做嘢，呢件事真係好恐怖
有無可能中聯辦亦都想趁機清走鄉紳勢力？因為多年前林鄭已想郁丁權，但睇個勢佢係無能力做到，而如果2047真係一國一制，按理丁權亦會消失，係咪怕到時鄉紳發爛所以而家就要郁手？不過我想聽聞鄉紳已同中聯辦傾掂數，會安然度過丁權永續。雲海有無咩風收到？感謝！
兩個月無表過態
我有興趣想知宜家「老左」點睇...
以後都係度通報下呀🙏🙏
無言感激
感謝
挑撥 和勝和 出人出力做到野 向生你地就唔愛國愛港
Hung Hong
感謝雲海，請多休息
感謝!
唔通中聯辦已經喺嚟緊兩場選舉箍夠票，還是已下令加強DQ候選人，所以放心做嘢？
睇返轉頭，如果唔係侯志強同簡炳墀喺7.13光復上水遊行撐場，呢班中字頭黑社會就喺嗰日攪「上水恐襲」
謝謝雲海兄，感謝您🙏🏻 我當晚睇住live都瞓唔著，超級嬲😡😡😡都諗緊係咪你書展Talk提過既事。我地既敵人係視人命如草芥架，正常人係難以理解！！咁香港政府係大幫兇！！睇住市民死都唔救既政府！！我唔識再講落去。。。
又係中聯辦！所以凡事必有因果，中聯辦比人圍唔係無原因！
土共班寄生蟲，就係咁仆街！
星期二！
Chan Sun
如此有心, 感恩您
尋晚我認為每一個香港人睇到依單野都會心痛的，但估唔到都仲可以有班人屈返d 被襲者先搞事先會被打，完全戾橫折曲。 Btw 如果真係中聯辦落order, 咁到底中聯辦可以從中有d咩得著？ 依樣有少少諗唔明
依家諗下諗下⋯其實佢哋應該就知道幾時會有事⋯幾時係冇事發生⋯村長又點會唔睇實乖孫⋯
到今日，全個元朗戒嚴，個個叫我快D返屋企唔好周圍走，我又再問下乖孫阿媽有冇收到風，佢就話冇事喎⋯兩個小朋友照去游水、興趣班，話出邊啲人太誇張喇，我地照出街呀咁⋯
回頭想我都覺得自己太唔敏感⋯話說我女有個friend 係某大村村長粒乖孫，早響星期二我女同乖孫見面時，佢媽已經同我講叫星期日記住唔好著黑色衫、盡量唔好出去，藥房老細朋友講晒佢地知，光復元朗係堅架咁⋯
雲海，真系好佩服你…! 心繫香港 ！ 心繫年青人。謝謝你 !
謝謝雲海守護啲年輕人🙇🏻♂️🙇🏻♂️🙇🏻♂️
三少，你被起我們，已經做得夠多了
同感，未睇呢篇都仲覺得係7婆警察黑社會三角問題，但一見到中聯辦就好似又俾舊大石壓住左 好無力好似連轉身既機會都無咁😞😞 到尋日先明白什麼禍不及妻兒係自己妻兒 唔係人地妻兒 咩盜亦有盜真係拍戲先有😔
感謝！
非常多謝您的資料及協助年青人
睇返片，個大肚婆不停被白衫用鐵通打頭
明白 , 感謝您 🙏💪
唉 唔知個大肚婆點😞😞
多謝您雲海！ 各自爬山💪🏻💪🏻
傳是這樣傳
琴晚睇住新聞完全嬲訓唔到～今日聽政府同D警方回應直頭當大家低能～好嬲好有無力感～😣😣😣
聽講有人錯手打左格離組大佬既女人？搞到今日要互片，單野堅定流？
越荒謬嘅事，先顯得呢個政府幾咁不堪！
Thanks 你做的都比我多吖
感謝雲海
都幾恐怖 泯滅人性到收錢打大肚婆
