香港人看英國新聞
patreon
英國新聞 BBC名主播愛華士製作兒童色情圖片罪成 被BBC追討近20萬鎊薪金 9-8-2024
🕑 Added 2024-08-09 22:53:04 +0000 UTC
BBC 要求胡．愛華士（ Huw Edwards ）歸還佢喺11月因為涉嫌製作兒童色情圖片被捕之後所賺取嘅超過20萬英鎊嘅人工。BBC 主席薩米爾 · 沙阿（ Samir Shah ）喺比員工嘅公開信中表示，呢位前主播「喺明知自己所做所為嘅情況下，繼續領取薪金，係不誠實嘅行為。
愛華士曾經係 BBC 最出名嘅新聞主播，喺因為涉嫌製作兒童不雅圖片被捕之後，佢仍然繼續領取人工成五個月咁耐。佢係舊年7月被停職，再喺四個月之後被捕，直到今年4月先辭去 BBC 嘅職務。沙阿表示，愛華士一直過住雙重生活，表面上佢係備受推崇嘅主播，但實際上佢背叛咗員工同觀眾嘅信任。佢話呢位主播係事件中嘅壞人，而受害者則係嗰啲因為佢嘅行為而受到羞辱嘅小朋友」。
愛華士喺今年7月承認咗三項製作兒童不雅圖片嘅罪名。據倫敦警察表示，呢啲控罪據稱發生喺2020年至2022年間，涉及37張喺 WhatsApp中分享嘅圖片。BBC 仲未確認如果愛華士拒絕歸還人工，係咪會透過法律訴訟追佢。BBC 總幹事添 · 大衛（ Tim Davie ）喺上星期嘅一次採訪中確認，BBC喺舊年11月就已經得知呢位主播因為涉及最嚴重類別嘅兒童色情圖片而被捕。
BBC 董事會喺一份聲明中表示支持總幹事及其團隊喺呢段時間所做嘅決定。聲明仲補充，如果愛華士向公司坦誠相告有關佢被捕嘅情況，BBC絕對唔會繼續出糧比佢，佢明顯損害咗公眾對 BBC 嘅信任，並令BBC公司聲譽受損。董事會已經同意檢討呢段時間得嚟嘅教訓，包括 BBC 對員工被停職時薪酬規則嘅處理方式。聲明又指出，儘管呢啲指控涉及佢嘅個人生活，但董事會認為，呢啲事件亦突顯咗職場中權力不平衡嘅問題。
喺二零二三年四月至二零二四年四月期間，愛華士嘅年薪接近四十八萬英鎊間。上星期，文化部長麗莎 · 南迪（ Lisa Nandy ）表示，愛華士應該將20萬英鎊歸還畀 BBC 。
