香港人看英國新聞
patreon
英國新聞 歐國盃、夏季減價齊發功 新季度英國經濟增長0.6% 16-8-2024
🕑 Added 2024-08-16 13:40:37 +0000 UTC
英格蘭喺歐洲國家杯中嘅表現令零售商嘅足球波衫、電視等電子產品同酒精飲品嘅銷量都有所增長，而網上銷售則達到咗自疫情以嚟嘅最高水平。官方數據顯示，由於二零二四年歐洲國家杯同夏季減價嘅推動，英國零售商上個月嘅銷售額有所上升，呢個係經濟增長嘅一個跡象。
國家統計局（ ONS ）表示，零售銷售額喺7月增長咗百份之零點五 ，而6月嘅時候係下跌咗百份之零點九嘅。不過，呢一個增幅依然略低於預期，經濟學家早前普遍預測七月嘅增長係百份之零點七。國家統計局補充，呢個增長得益於體育用品商店同百貨公司嘅減價促銷，以及歐洲國家盃肇行期間所帶出嘅購買需求。零售商表示，隨住英格蘭隊喺歐國杯決賽中嘅表現，波衫、電視等電子產品同酒精飲品嘅銷量都有所增長。
不過，服裝同鞋類嘅銷量下降咗百份之零點六 ，家居用品嘅銷量亦同樣下降咗百份之零點六 。同時，食品嘅銷售額喺呢個月保持穩定，冇明顯變化。六月購買量嘅下降被歸因於選舉唔確定性、惡劣天氣同人流量減少。然而，呢一個下降幅度比最初預期嘅要細，最初估計係會下降百份之一點二。呢個亦係連續第11個月服裝銷售下降，因為7月底嘅氣溫上升嚟得太遲，未能提振夏天嘅季節性銷售增長。然而，網上銷售增長得好勁，佔據咗全部銷售嘅百份之二十七點八，呢個係自二零二二年二月疫情以來嘅最高比例。
零售銷售數據之所以重要，係因為家庭消費（由呢啲數據衡量）係英國經濟中最大嘅支出項目。呢啲數據仲可以幫助追蹤消費者對自身財務狀況同整體經濟嘅感受。最新嘅國家統計局數據標誌住一個星期嘅公告結束，呢一個星期嘅公告顯示英國經濟喺三個月內增長咗百份之零六；7月嘅通脹率達到百份之二點二 ，比前一個月嘅百份之二有所上升；工資仍然喺上升，但係增速放緩。
新任工黨政府寄希望喺增加公共支出同經濟整體成功嚟推動經濟增長。但財相李韻晴（ Rachel Reeves ）表示，保守黨留低咗220億英鎊嘅公共財政赤字，而工黨繼承咗自第二次世界大戰以來最差嘅經濟。
